MERE ASHA’R
Jab raat andheri hoti h
Aur sari duniya soti hai
Us Tanhai men mere dil men
Ek ajeeb khalish si hoti hai
Duniya ki bateN bhool ke main
Khud apne meN kho jata hooN
Kuchh yaadeN ubharne lagti hai
Main mehv khayal ho jata hooN
Us waqt mere ander se
Maazi ki yaadeN nikharti haiN
Aur woh raat ki tanhai meN
Mujh se bateN karti haiN
Woh yaadeN; woh murjhae phool
Phir kaghaz par khil jate haiN
Aur khoe hue mere sapne
Mujh ko phir mil jate haiN
woh she’er jo us waqt lkhta hooN
woh qatre mere khoon ke haiN
woh mere dil ke tukre haiN
woh qisse mere junoon ke haiN
Likhne ke baad aksar mujh ko
Ek khayak satane lagta hai
Aur us khayal ke aate hi
Mera dil ghabrane lagta hai
Yeh she’eroN ka jo khazana hai
Shaamil hai jis meN khoon mera
Isko meri jaagir samajh lo
In se hi hai sukoon mera
Mere baad in becharoN ka
Hasher na jane kya hoga
Kaun kare ga qadar in ki
Anjaam na jane kya hoga
Jo mere baal aur bachche haiN
Nawaqif meri zaban se haiN
Unke aage mere asha’ar
Bemaane aur be jaan se haiN
Ya koore meN phink jaeN ge
Ya nazare aatish ho jaeN ge
Koi unko nahiN poochhe ga
Woh mere sath mar jayeN ge
Yeh soch ke aksar aankhoN se
Kuchh ashk rawaN ho jate haiN
Aur bheeg ke aansoo se asha’ar
Phir se jawaN ho jaate haiN
----- Arshad Khan, Arshad Lakhnavi
|