Bichharh
Aata hai parvana sha’ma ke pas marne ke liye
Aur sha’ma khud ko jalati hai roshni karne ke liye
yaadeN tamam hoti haiN ikattha kare ga kon
Bus ek yaad kaafi hai aankh bharne ke liye
haaN mujhe maloom hai raheN juda haiN apni ( Juda = different)
chalo kuchh der mere saath aasaan safar karne ke liye
Hum haiN woh nakhuda hai jise har dum Khuda ka saath (Nakhuda = Captain of ship)
HaiN sada tyyar hum toofaN meN utarne ke liye
Hum nahiN un men se jo marte haiN to mar jaate haiN
Hum to khursheed hain doobte haiN phir ubharne ke liye (khursheed = Sun )
main ne poochha naseem-e-subh se kya phooloN ko bikhrae gi (naseem-e-subh=morning breeze)
who boli phool to khilte haiN aakhir ko bikharne ke liye
MaiN hua rusuwa aur badnam kiya tu ne mujhe (rusuwa = humiliate)
Bahut himmat chahiye mohalle se guzarne ke liye
Apni to saari umr guzri hai aise “arshad”
Bichharh ke milne ke liye, mil ke bichharhne ke liye.
--Arshad Khan, “Arshad” Lakhnavi July2015
|